"Kristin stjórnmálasamtök" endurvarpa lygum

Steindór Sigursteinsson í "Kristnum stjórnmálasamtökum" skrifar færsluna "ISIS-klerkur traðkar ungbarn kristinna foreldra, sem ekki vildu snúast til islamstrúar, til dauða" og hefur þessar "upplýsingar" eftir Gylfa Ægissyni.

Einhver ætti að kynna þessa herramenn fyrir vefsíðu sem heitir Google.com - með hjálp hennar tók það mig bara nokkrar sekúndur að komast að því að þessi "frétt" er uppspuni.

Þessi hálfviti sem virðist vera að misþyrma barni á myndinni er ekki Ísis-klerkur, heldur bangladessíski andatrúarkuklarinn Amzad Fakir, sem var handtekinn fyrir þetta.

Þetta er ekki saga um að Ísis kremji "kristin smábörn" heldur um að "andlæknar" geti verið stórhættulegir.

Athugasemdir

[Jón Valur Jensson, 3.3.2016 kl. 21:18]

Kannski er þetta rétt hjá þér, við skulum athuga málið og leiðrétta þá færsluna.

[Kristin stjórnmálasamtök, 3.3.2016 kl. 23:03]

Ertu ekki sjálfur heldur fljótur á þér að gefa þér að þú finnir sannleikann á "bara nokkrum sekúndum". ISIS beitir m.a. lygavopnum í sinni skefjalausu baráttu og er t.d. svo hrætt við að umheimurinn heyri sannleikann, að í stað þess að leyfa allnokkrum frönskum liðsmõnnum sínum að hætta og fara heim, drápu ISISmenn Frakkana. Svo drepa þeir kristna karlmenn, en nauðga konum þeirra og jafnvel bráðungum dætrum og selja í kynlífsánauð eða múslimskt hjónaband!

[Kristin stjórnmálasamtök, 3.3.2016 kl. 23:06]

 Innleggið var mitt.

Jón Valur Jensson.

[Jón Valur Jensson, 4.3.2016 kl. 00:01]

Innleggið var mitt.

[Jósef Smári Ásmundsson, 4.3.2016 kl. 06:26]

Hvort sem fréttin er rétt eða röng er ISIS alveg trúandi til að fremja þetta ódæði. því miður. En að sjálfsögðu er betra að fréttaflutningur sé réttur.

[Steindór Sigursteinsson, 4.3.2016 kl. 07:07]

Ég biðst afsökunar á að það virðist að ég hafi verið helst til of fljótur á mér að fullyrða að fréttir sem ég fann á 3 heimasíðum hafi verið sannar.  En því miður reyndust þetta vera lygafréttir.  Ég vil segja að ég er miður mín að hafa birt eftirfarandi færslu en hún birtist á bloggsíðu Kristinna Stjórnmálasamtaka.  Sárast þykir mér að hafa ef til vill komið óorði á KS sem reyndar var ný komin í stórhausahópinn á Blogg.is.  En við höfum nú verið færðir burt þaðan.  Ég bið hlutaðeigandi aðila að færa okkur aftur í stóhausahópinn því ég ætla að reyna eftir fremsta megni eftirleiðis að birta aðeins það sem satt er.  Ég biðst innilega afsökunar.

[Óli Jón, 4.3.2016 kl. 18:52]

Kristin stjórnmálasamtök hafa verið í þessum stórhausahópi um margra ára skeið.

[Steindór Sigursteinsson, 5.3.2016 kl. 13:42]

Þakka þér Vésteinn fyrir að upplýsa okkur um að þessi frétt sé uppspuni.  Heimasíðan sem þú vísar á "Snopes.com" virðist hafa rétt fyrir sér að fréttin sem ég birti er röng.  Ég var svo auðtrúa að taka fréttir sem ég fann á 3 eða fleiri heimasíðum sem sannleika.  Ég sé nú í myndleit fyrir þennan Amzad Fakir að þetta er sami maðurinn og er á myndunum í fréttunum.  Ég vil segja að ég gerði mistök þegar ég sagði að Gylfi blessaður hafi deilt þessum 3 heimasíðum á FB.  Sannleikurinn er að Gylfi deildi einni en 1 deilingin var skráð sem "fólk deildi einnig" á FB Gylfa.  En 3. heimasíðuna fann ég sjálfur á netinu reyndar fann ég nokkrar sem fjölluðu um þetta.  Reyndar voru það mistök að nefna Gylfa blessaðan í færslunni en það var vegna mistaka minna þegar ég sendi stjóranda KS heimasíðunnar færsluna.  Ég er fullviss um að Gylfi hafi birt þessa frétt af góðri trú og haldið að hún væri rétt og sönn.  En eitt er víst að vígamenn ISIS eru þó ekki neinir saklausir öðlingar þótt að komið hafi í ljós að fréttin sem ég skrifaði um þá sé röng.

[Wilhelm Emilsson, 11.3.2016 kl. 22:00]

Síðuhafi mætti einnig kynna sér Google. Hann heldur þessu fram: "Því er við að bæta að ég held að nasistar hafi framið Katyn-fjöldamorðin."

Rússnesk stjórnvöld hafa viðurkennt að nasistar frömdu ekki morðin en á sama hátt og Jón Valur Jensson er stundum kaþólskari er páfinn þá er síðuhafi stundum rússneskari en Pútín.

Heimild: 

In 1992 the Russian government released documents proving that the Soviet Politburo and the NKVD had been responsible for the massacre and cover-up and revealing that there may have been more than 20,000 victims. In 2000 a memorial was opened at the site of the killings in Katyn.

Encyclopedia Brittannica.

En þetta er kannski bara áróður heimsvaldasinna að mati síðuhafa.

[Vésteinn Valgarðsson, 13.3.2016 kl. 22:00]

Ég veit vel að rússnesk stjórnvöld hafa lýst þessu yfir. Hins vegar sé ég ekki hvers vegna ég ætti að taka mark á þeirri yfirlýsingu.

[Wilhelm Emilsson, 14.3.2016 kl. 03:45]

Takk fyrir svarið, Vésteinn. En hvers vegna ekki? Ég veit að maður getur ekki alltaf treyst stjórnvöldum, en þetta hefur verið rannsakað. Þú hefur trú á Snopes. Hefurðu ekki trú á Encyclopedia Brittannica og öllum þeim sagnræðingum sem hafa rannsakað stjórnartíð Stalíns?

[Vésteinn Valgarðsson, 14.3.2016 kl. 16:56]

Eins og fram kemur í tilvitnuðum orðum mínum, þá held ég að nasistar hafi framið fjöldamorðin í Katyn og ætla ekki að fullyrða um það - bara svo það sé á hreinu.

Allar götur frá 19. flokksþingi Kommúnistaflokks Sovétríkjanna hafa leiðtogar Sovétmanna og Rússa lagt sig fram um að klína sem mestum ásökunum um glæpi á Stalín. Það er sami andinn ríkjandi í leyniræðu Krústsjéfs og hjá Jeltsín 1992. Það er ekki sannleiksástin sem ræður för heldur antagónisminn, þar sem menn sverta forverana af sínum eigin ástæðum.

Og það eru nefnilega ekki "allir sagnfræðingar sem hafa rannsakað stjórnartíð Stalíns" á sama máli um hver bar ábyrgð á Katyn. Ég hef m.a. lesið um það einhvers staðar að þessi skjöl sem voru gerð opinber 1992 hafi barasta verið fölsuð, eins og tíðkast oft í heimsins hildi. En hver vill vita af því í dag, að Stalín hafi hugsanlega verið saklaus af einhverju sem hann er sakaður um?

[Wilhelm Emilsson, 15.3.2016 kl. 18:13]

Takk fyrir svarið, Vésteinn. 

Þú gætir haft áhuga á þessu: http://news.bbc.co.uk/2/hi/europe/8649435.stm

Ef þú getur bent á málsmetandi sagnfræðing sem trúir því að Stalín hafi ekki skrifað undir tillögu Beria um fjöldamorðin í Katyn þá væri fengur í því.

Mikið hefur verið skrifað um Stalín og nýlega hafa sagnfræðingar bent á margar rangfærslur varðandi stjórnartíð hans. Hann var til dæmis ekki sá mennilegarlausi þurs sem andstæðingar hans héldu fram, eins og t.d. Trotsky.

Það er sjálfsagt að líta á samhengið í rússneskum stjórnmálum. Stalín notaði það klassíska bragð að sverta forvera sína og það var notað gegn honum. En eftir að hafa lesið þrjár ævisögur um hann, sú elsta er eftir sósjalistann Isaac Deutscher, þá komst ég að því að Stalín og kommúnismi eins og hann var praktíseraður í Sovétríkjunum var enn verri en ég hélt.

[Vésteinn Valgarðsson, 16.3.2016 kl. 20:33]

Afsakaðu hvað ég er lengi að svara. Í mörg horn að líta. En líttu t.d. á greinina US Historian: Stalin Not Guilty of Major War Crime Blamed on Him (Katyn) þar sem kanadíski prófessorinn Grover Furr segir frá sínum niðurstöðum.

[Wilhelm Emilsson, 16.3.2016 kl. 21:59]

Ekkert mál. Ég hlakka til að lesa þetta. En Grover Furr er ekki sagnfræðingur. Hann er bókmenntafræðingur.

[Vésteinn Valgarðsson, 16.3.2016 kl. 22:35]

Hann er prófessor í bókmenntasögu miðalda. Það er kannski álitamál hvort bókmenntasaga á að flokkast undir bókmenntafræði eða sagnfræði.

[Vésteinn Valgarðsson, 16.3.2016 kl. 22:37]

Ég veit ekki hvort linkurinn kemur rétt fram hjá mér. Slóðin á að vera: http://russia-insider.com/en/us-historian-stalin-not-guilty-major-war-crime-blamed-him-katyn/ri6305

[Wilhelm Emilsson, 16.3.2016 kl. 22:52]

B.A. gráðan er í ensku (McGill)

Ph.D. er í bókmenntafræði (Comparative Literature) (Princton)

Hann kennir í enskudeild (Montclair State University)

Það má vissulega deila um margt, en það er óumdeilanlegt að titill Grovers Furr er bókmenntafræðingur en ekki sagnfræðingur.

[Wilhelm Emilsson, 16.3.2016 kl. 22:53]

Takk fyrir hlekkinn!

[Vésteinn Valgarðsson, 17.3.2016 kl. 18:44]

Hann er kannski bókmenntafræðingur, það er ekkert aðalatriði fyrir það sem hann skrifar. En hann hefur reyndar skrifað fleira krítískt um Sovétríkin, heldur því m.a. fram að leyniræða Krústséffs sé að miklu leyti bara lygi.