RIP, mikli meistari

Síðan ég var unglingur hefur Lemmy Kilmister borið höfuð og herðar yfir aðra rokkara og fáir komist nálægt honum. Sem fullorðinn maður sá ég hann níu sinnum á tónleikum, einu sinni í Bretlandi og átta sinnum í Þýskalandi. Það voru góðar stundir.

Hann var kannski fylliraftur, hann var kannski dópisti, hann var kannski flagari, hann var kannski hás gamall karl með loðin kýli út úr andlitinu, en hann var alltaf langflottastur og alltaf einstakur.

Söngvari Motörhead látinn

Hræsnisbandalag sykurpabba

Sádi-Arabar og Tyrkir geta trútt um talað að berjast gegn íslamska ríkinu -- sjálfir aðalstyrktaraðilar þess. Ef þeir vildu í alvöru stöðva framgang þess væri góð byrjun að hætta að senda þeim vopn og peninga í skipsförmum.

Það þarf ekki frekari vitnanna við, þegar Sýrlandi, Írak og Íran er haldið utan við: það eru löndin sem Sádar beina spjótum sínum mest gegn, og jafnframt þau lönd, ásamt Rússlandi, sem raunverulega eru að berjast gegn íslamska ríkinu.

Þess er annars vert að minnast, að Sádi-Arabía er sjálf íslamskt ríki, og vandséð að það sé neitt betra að vera hálshöggvinn, hýddur eða grýttur af þeim heldur en af handbendum þeirra í Írak og Sýrlandi. Gæti heitir "Íslamska ríkið á Arabíuskaga".

Hernaðarbandalag 34 landa

Skertur samningsréttur stéttarfélaga

Þórarinn Hjartarson skrifar um þreifingar um rammasamkomulagið um vinnumarkaðinn, sem var undirritað í haust:

Skjótt og hávaðalaust er komin í notkun NÝ UMGJÖRÐ um kjaraviðræður í landinu. Rammi sem engar kröfur mega fara út fyrir liggur fyrir í upphafi viðræðna. Aldeilis tromp fyrir atvinnurekandann að slá í borðið með!

Er þetta nokkuð annað en tæki fyrir auðvaldið, til að skammta vinnandi fólki laun? Lesið grein Þórarins: Skertur samningsréttur stéttarfélaga.

Hið þríeina stríð gegn borgaralegum mannréttindum og frelsi (ályktun)

Landsfundur Alþýðufylkingarinnar, sem haldinn var á dögunum, ályktaði um hið þríeina stríð gegn borgaralegum mannréttindum og frelsi. Í ályktuninni segir meðal annars:

 

Stríðið gegn fíkniefnum drepur milljónir sjúklinga á hverju ári, stimplar neytendur sem glæpamenn og leyfir glæpaklíkum að einoka markaðinn, oft með skelfilegum afleiðingum fyrir saklausa borgara. Það er í nafni þessa stríðs sem íslensk ungmenni eru gerð ærulaus, finnist þau með korn af kannabis í fórum sínum.

 

Enn fremur segir:

 

Stríðið gegn hryðjuverkum drepur hundruð þúsunda saklausra borgara árlega, heldur þjóðum í herkví og takmarkar gróflega frelsi flugfarþega, sem eru meðhöndlaðir sem glæpamenn við vopnaleit. Það var í nafni þessa stríðs sem ráðamenn Íslands gerðust stríðsglæpamenn í Írak.

 

Þá segir:

 

Stríðið gegn internetinu veldur því að fólk eins og Chelsea Manning situr í fangelsi, Edward Snowden er landflótta og Julian Assange má sig hvergi hræra af ótta við að verða framseldur til Bandaríkjanna - fyrir það eitt að leka upplýsingum. Í nafni öryggis, bannhyggju og forvarna er aðgangi almennings að upplýsingum eða að koma frá sér upplýsingum lokað eða reynt að loka víðsvegar í heiminum. Það er í nafni þessa stríðs þegar íslenskir ráðamenn ætla að loka fyrir aðgang almennings að hluta internetsins.

 

Lesið ályktunina í heild sinni á heimasíðu Alþýðufylkingarinnar:

 

Hið þríeina stríð gegn borgaralegum mannréttindum og frelsi

Húsnæðiskreppan: ályktun landsfundar Alþýðufylkingarinnar

Landsfundur ALþýðufylkingarinnar, sem haldinn var um seinustu helgi, ályktaði um húsnæðismál:

Stefna íslensku auðstéttarinnar er að nota húsnæðisþörf fólksins sem féþúfu sem gefur af sér hámarksgróða. Í meira en 30 ár hefur almenningur borgað margfalt fyrir íbúðir sínar með okurvöxtum.

Ríkisstjórnin sem sat kjörtímabilið 2009-2013 sá þá lausn helsta á skuldavanda almennings að reka þá fátækustu út á götuna og neyða þá til að borga himinháa húsaleigu m.a. með því að hindra aðgang að lánsfé nema til braskara.

Hvað er þá til ráða? Ályktunin svarar því:

Eina leiðin út úr húsnæðiskreppunni er sú sem Alþýðufylkingin hefur boðað, með félagsvæðingu fjármálakerfisins. Skref í þá átt gæti verið að allir geti fengið vaxtalaust lán að vissri upphæð af samfélagslegu eigin fé til húsnæðiskaupa.

Að sama skapi þarf að vera nægt framboð á félagslegu húsnæði án fjármagnskostnaðar til að uppfylla þörf fyrir leiguhúsnæði.

Lesið ályktunina í heild: Húsnæðiskreppan.

Alþýðufylkingin vill verja samningsrétt verkalýðsfélaganna

Á landsfundi Alþýðufylkingarinnar um síðustu helgi var samþykkt ályktun um brýnt mál: samningsrétt verkalýðsfélaganna. Tilefnið er samkomulag SALEK-hópsins, sem ber sterkan þef af stéttasamvinnustefnu. Þar stendur meðal annars:

Reynslan sýnir hins vegar að stéttasamvinnustefnan hefur aldrei skilað neinum árangri til bættra kjara fyrir verkafólk. Það hefur aldrei náð neinu fram án baráttu. Við óbreytt ástand eru lágmarkskjör alþýðunnar hins vegar stillt við hungurmörk til að tryggja auðstéttinni hámarksgróða.

Líka:

Sú breyting sem helst þarf að gera á vinnumarkaðsmódelinu er að losna við sjálftöku fjármálaauðvaldsins út úr raunhagkerfinu og styðja baráttu vinnandi fólks fyrir réttlátum hlut.

Lesið ályktunina í heild hér: Verjum samningsrétt verkalýðsfélaganna.

Ályktun um kreppu, stríð og byltingu

Landsfundur Alþýðufylkingarinnar um síðustu helgi ályktaði um kreppu auðvaldsskipulagsins, heimsvaldasinnaðan stríðsrekstur og nauðsyn byltingar:

Almenn kreppa auðvaldins hefur nú farið dýpkandi um árabil og möguleikar þess til vaxtar og þróunar eru tæmdir. Að sama skapi verður afætueðli auðvaldsskipulagsins alls ráðandi og átök fara harðnandi milli stórvelda og bandalaga þeirra um auðlindir og áhrifasvæði. Í þeim átökum er mannslífum fórnað í stórum stíl og velferð fólksins um allan heim höfð að skiptimynt.

Þar segir líka:

Þrátt fyrir aukna þekkingu á umhverfi og náttúru eykst umhverfisvá á flestum sviðum, þannig að sífellt stærri svæði jarðarinnar verða óbyggileg, hlýnun af manna völdum er að fara úr böndunum og vistkerfum hrakar.

Að óbreyttu heldur áfram glundroði og upplausn samfélaga. Styrjaldir heimsvaldasinna magnast og leysa upp samfélagsinnviði heilla heimshluta.

Hvað er til ráða?

Til að hindra að [þessi þróun] haldi áfram er hins vegar nauðsynlegt að fólkið taki til sinna ráða og sameinist um stefnu sem miðar að því að svipta auðstéttina sínum efnahagslegu og pólítísku yfirráðum í samfélaginu og endurreisa það á félagslegum forsendum. Pólitísk og félagsleg skipulagning með þetta markmið er lífnauðsyn fyrir íslenskt samfélag eins og alls staðar annars staðar. Framtíð mannkyns og siðmenningar er í húfi.

Lesið ályktunina í heild hérna:

Kreppa auðvaldsins, heimsvaldastríð og nauðsyn byltingar

Ályktun Alþýðufylkingar um heilbrigðis- og velferðarmál

Á landsfundi Alþýðufylkingarinnar á dögunum var samþykkt gagnmerk ályktun um heilbrigði- og velferðarmál, sem lýsir m.a. „beiskri gremju yfir þeirri hörðu sveltistefnu sem íslenska heilbrigðiskerfið hefur verið rekið eftir um langt árabil og miðar að vaxandi einkavæðingu.”

Um nýjan Landspítala við Hringbraut segir:

Áformin um að byggja fokdýrt, nýtt háskólasjúkrahús á óhentugum stað - áform sem líta út fyrir að vera óstöðvandi - virðast klikkuð, en skiljast þegar fjármögnunin er tekin með í reikninginn: að brasksjóðir atvinnurekenda- og verkalýðsaðalsins fái tækifæri til að fjárfesta í byggingum og leigja þær svo ríkinu með öruggum tekjum áratugi fram í tímann - það er hvöt sem við berum kennsl á. Þar ræður ágirnd og gróðafíkn fjármagnsins för, en ekki hagsmunir sjúklinga eða almennings.

Þá segir, um leiðina út úr ógöngum íslenska heilbrigðiskerfisins:

Lykillinn að því að endurreisa þessa máttarviði þjóðfélagsins er félagsvæðing heilbrigðis- og velferðarkerfisins, sem og félagsvæðing fjármálakerfisins. Sú síðastnefnda losar um fjármagn, sem núna rennur úr opinberum sjóðum í óseðjandi hít gróðadrifins fjármálakerfis, og væri betur komið í þágu heilsu og velferðar.

Lesið ályktunina í heild sinni hér:

Ályktun um heilbrigðis- og velferðarmál

Líbýa, Írak ... og Júgóslavía

Íslendingar bera sína ábyrgð á stríðunum gegn Líbýu og Írak og eðlilegt væri að þáverandi ráðamenn yrðu sóttir til saka fyrir glæpi gegn mannkyni. En það má ekki gleyma loftárásunum á Júgóslavíu, sem Davíð Oddsson og Halldór Ásgrímsson samþykktu -- þeir beinlínis studdu loftárásir og það á borgaraleg skotmörk, eins og fjölmiðla -- á leiðtogafundi NATO í Washington 23. apríl 1999.

Studdi ekki hernaðaraðgerðir

Af landsfundi Alþýðufylkingarinnar

Alþýðufylkingin hélt vel heppnaðan landsfund um helgina. Sjá hér um stjórnarkjör.

Marxismi á vorum dögum: málþing 7. nóvember

Marxismi á vorum dögum: málþing um marxismann

Rauður vettvangur efnir til málþings um marxisma á vorum dögum laugardaginn 7. nóvember kl. 14 í Friðarhúsi, Njálsgötu 87 (horni Snorrabrautar).

Rætt verður um erindi marxismans við nútímann og nokkur helstu álitamál í þeim efnum. Framsögumenn: Sólveig Anna Jónsdóttir, formaður Attac, Vésteinn Valgarðsson, formaður Rauðs vettvangs, Þorvaldur Þorvaldsson, formaður Alþýðufylkingarinnar.

Umræður verða að loknu hverju framsöguerindi og einnig í lokin.

Allir eru velkomnir

Leifur var Grænlendingur

Þótt foreldrar Leifs hafi verið norskir voru þau Íslendingar þegar þau höfðu numið land hér, og urðu Grænlendingar þegar þau námu land þar. Leifur var Grænlendingur líka. Af þjóð sem er útdauð.

Var Leifur heppni norskur?

Áróður og blekkingar í Sýrlandi

Ath.: "ónefndir bandarískir embættismenn" segja að flaugarnar hafi hæft Íran.

Og hvað með það?

Bandaríkin eru mótfallin því að Rússar blandi sér beint í Sýrlandsstríðið. Þau vilja koma Assad frá völdum, og í því skyni hafa þau og bandamenn þeirra vopnað og stutt allra handa hyski og rumpulýð. Þeim er alveg sama um mannlegan fórnarkostnað -- þau vilja bara koma Assad frá.

Bandaríkin dreifa því (skiljanlega) áróðri til að spilla fyrir Rússum. Til dæmis að hernaður þeirra sé klaufalegur -- flaugar hitti vitlaust land eða vitlausa hryðjuverkamenn.

Í því samhengi er vert að athuga að Bandaríkjamenn sjálfir skjóta mjög mikið á innviði Sýrlands -- rústa brúm, olíuhreinsunarstöðvum, stíflum, alls konar samfélagslega mikilvægum mannvirkjum (og fólki með, nema hvað) -- undir því yfirskini að ISIS sé á svæðinu. Er skrítið að það hvarfli að manni að ISIS sé öðrum þræði nokkurs konar fyrirsláttur til þess að hafa afsökun fyrir að eyðileggja innviðina, svo Sýrlendingar geti ekki notað þá lengur þegar herinn loksins gengur milli bols og höfuðs á þessum föntum?

Það er annars kyndugt hvað það eru óskýr mörkin milli þeirra sem Vesturveldin kalla vini og óvini sína þarna. "Hófsamir íslamistar" breytast skyndilega í ISIS þegar Kanar eru búnir að afhenda þeim bílfarmana af vopnum. Og þegar ISIS vantar ný vopn, þá dúkka allt í einu upp "hófsamir uppreisnarmenn".

Stýriflaugar hæfðu Íran

Bitlausar hótanir

Ég leyfi mér að efast um að Landssamband lögreglumanna standi fyrir því að áætla ólöglegar verkfallsaðgerðir eins og að misnota veikindarétt í kjarabaráttunni. (Misnota, segi ég, því að þótt tilgangurinn sé góður, þá er veikindaréttur til þess að nota í veikindum og ekki í neinu öðru.) Og ef LL er með puttana í þessu, hafa þeir örugglega vit á að fela slóðina nógu vel til að það sé ekki hægt að sanna neitt á sambandið. Þannig að hótanir um "réttarúrræði" gegn LL eru bitlausar -- en gætu vel hleypt meiri kergju í löggurnar sjálfar.

"Réttarúrræði" gegn einstökum löggum væru jafnvel ennþá vitlausari. Ef maður telur sig stórlega vanhaldinn af launum sínum, og fær einhver "réttarúrræði" ofan í kaupið -- nú, þá hygg ég að margir svari með löngutönginni og rói á önnur mið.

Það er annars skondið, að eina stéttin á Íslandi, sem fer leyfir sér að fara stundum ólöglegar leiðir til að berjast fyrir kjörum sínum -- það sé lögreglan.

Nú er lögreglunni bannað með lögum að heyja baráttu fyrir kjörum sínum. Ef ríkisvaldinu finnst það þurfa að banna einhverri stétt kjarabaráttu, þá fylgir því sú skylda að stéttin sé almennilega launuð.

Ráðuneytið hótar lögreglu lögsókn

Sannleikurinn ógnar svínaríinu

Svínaeldi fer víðast hvar fram við aðstæður sem er óhætt að kalla viðbjóðslegar. Meira að segja þótt "reglum um velferð dýra" sé fylgt. Þetta vita allir sem kæra sig um að vita það. Eða hvenær hefur maður séð svín á beit úti í haga þegar maður keyrir um sveitir landsins? Hvaða rugl er það að gefa TÍU ÁRA aðlögunartíma til að bæta úr??

Orðspor greinarinnar í hættu

Gleymda nýlendan

Það er ein einasta alvöru nýlenda eftir í Afríku í dag. Það er Vestur-Sahara. Víðfeðmt land og mjög stjálbýlt, sem Spánverjar yfirgáfu á 7. áratugnum -- og Hassan Marokkókóngur sendi her sinn umsvifalaust inn til að hertaka það. Marokkó hefur hrakið Sahrawi-menn út í eyðimörkina og ofsótt þá. Fyllt þéttbýlissvæði af landtökufólki. Lætur greipar sópa um náttúruauðlindirnar, ekki síst gjöful fiskimið og auðugar fosfat-námur. Það er meira að segja íslenskt útgerðarfélag sem gerir út á hestamakríl, og kannski fleira, undan ströndum Vestur-Sahara. Borga Marokkómönnum fyrir rányrkju á auðlindum Sahrawi-manna. Svei þeim.

IKEA í miðri milliríkjadeilu

Vonlaus barátta

"Ríkisstjórn" Afganistans er réttnefnd leppstjórn Bandaríkjamanna, komið á laggirnar af þeim og haldið uppi af þeim. Um leið og Kanar hætta að hjartahnoða hana leggur hún upp laupana.

Gengur illa í baráttunni við talibana

Ályktun Alþýðufylkingarinnar um mál flóttamanna

Alþýðufylkingin er þeirrar skoðunar að Ísland ætti að taka við eins mörgum flóttamönnum og mögulegt er. Bæði vegna þess að sjálfsagt er og rétt að hjálpa þeim sem þurfa á hjálp að halda og vegna þess að Ísland ber ákveðna ábyrgð á flóttamannstraumnum í gegnum stuðning við stríð sem hafa rekið fólk á flótta, og okkur ber því að axla þá ábyrgð. Eins og allir vita flýr fólk nú stríðsátök í milljónatali með von um tækifæri til að lifa eðlilegu lífi. Það er ekki hægt að skorast undan þeirri ábyrgð að veita þeim alla þá aðstoð sem við getum boðið. Það ástand sem skapast hefur í mörgum ríkjum Miðausturlanda er að mestu leyti afsprengi vestrænnar hernaðaríhlutunarstefnu auk þess sem hún hefur gert illt verra í þeim átökum sem ekki skrifast á hana beint.

Alþýðufylkingin fordæmir einnig þá stefnu sem ríkt hefur í málefnum flóttafólks hjá bæði stjórnvöldum Íslands og Evrópusambandsríkjunum. Nú þegar ekki er lengur hægt að hunsa vandann, ýta honum undan sér og að safna fólki saman í flóttamannabúðir í þeirri von að það hverfi, þegar vandinn hefur fengið að vinda upp á sig svo rækilega ekki var hægt að loka augunum fyrir honum lengur reyna stjórnvöld Evrópuríkja að koma sér saman um aðgerðir sem líklega reynast „of lítið, of seint“. Það er engan vegin boðlegt að taka við ákveðnum fjölda flóttafólks í eitt skipti og halda svo áfram þeirri stefnu að senda fólk úr landi til að safna þeim saman í flóttamannabúðum. Grundvallarstefnubreytingu er þörf ekki bara á Íslandi heldur í Evrópu. Stríðsátökunum sem fólkið flýr, með öllu því ofbeldi og upplausn sem þeim fylgir, virðist ekki vera að fara að ljúka neitt á næstunni.

Það er mikilvægt að tekið sé vel á móti því flóttafólki sem hingað kemur, það upplifi sig raunverulega velkomið og hafi öll sömu tækifæri, réttindi og skyldur og aðrir íbúar landsins. Þegar í hræðsluáróðri vísað er til „innflytjendavandamála“ í nágrannalöndum okkar er með yfirborðskenndum og villandi hætti vísað til félagslegra vandamála sem sköpuð eru og viðhaldið er fyrst og fremmst vegna jaðarsetningar og stéttskiptingar. Vandamálið er ójöfnuður, félagslegur og efnahagslegur, en ekki uppruni, menning eða trúarafstaða.

Við eigum að stela slagorðinu af fótstalli Frelsisstyttunnar og gera það að okkar: Gefið mér ykkar þreyttu, fátæku og kúguðu sem þrá að draga andann frjálsir!

 

Alþýðufylkingin 28. september 2015

Hitt íslamska ríkið

Þegar menn gagnrýna Íslamska ríkið í Sýrlandi og Írak fyrir grimmd, þá vilja menn gleyma því að annað íslamskt ríki er aðeins sunnar, þar sem sama grimmdin viðgengst og mannréttindi eru eitthvað til að setja ofan á brauð.

Eitt er það að menn eigi diplómatísk samskipti við Saúdi-Arabíu eða viðskipti. En það keyrir um þverbak í hræsninni þegar Saúdar og aðrir kóngar eða emírar taka þátt í því með Vesturveldunum, að "útbreiða lýðræði" til landa eins og Líbýu eða Sýrlands.

Verður gerður höfðinu styttri

"Á skjön við sögulegan sannleik"

"en ekkert land missti fleiri íbúa í styrjöldinni"

Það vita allir að ekkert land missti fleiri en íbúa í seinni heimsstyrjöldinni heldur en Sovétríkin, enda báru þau hitann og þungann af baráttunni gegn nasistum, færðu langstærstu fórnirnar og stóðu uppi sem sigurvegari við stríðslok. Á okkar dögum er það kallað "á skjön við sögulegan sannleik" þegar hetjudáða Sovétmanna er minnst, enda skrifa sigurvegararnir söguna og það sem menn kalla "sögulegan sannleik" á hverjum tíma endurspeglar ríkjandi hagsmuni.

Póllandi millistríðsáranna var stjórnað af herforingjastjórn, svartasta afturhaldi, sem sá ekki Þjóðverja heldur Sovétmenn sem aðalógnina. (Það er kannski skiljanlegt í ljósi stríðsins sem þeir háðu ekki svo mörgum árum áður.) Kommúnistaflokkurinn var bannaður í Póllandi, og fleiri stjórnarandstöðuflokkar, og það má líka halda því til haga að Pólland fékk sneið af Tékkóslóvakíu í Münchenarsamningnum 1938. Þannig að þetta voru nú engir englar sem réðu Póllandi í þá daga.

Því er við að bæta að ég held að nasistar hafi framið Katyn-fjöldamorðin.

Að hluta Pólverjum að kenna