Má kalla blökkumenn negra?

Ég held að tilfinning Íslendinga fyrir orðinu "negri" sé svipuð og fyrir orðinu "nigger" í ensku en að "svertingi" veki svipaða tilfinningu og "negro". En ég held að "neger" á dönsku veki frekar svipaða tilfinningu og "svertingi" heldur en "negri" á íslensku, þ.e.a.s. hljómi ekki eins neikvætt í eyrum fólks.

Það er í sjálfu sér ekki aðalatriðið hvað menn kalla menn - orðið "svertingi" er ekkert neikvæðara en "blökkumaður" - heldur er aðalatriðið auðvitað viðhorfið. Ef manni er í nöp við blökkumenn, þá hefur orðið "blökkumaður" jú líka neikvæða merkingu, er það ekki?

Umdeildur ráðherra settur í umhverfismálin

Hvar endar þetta eiginlega?

Isavia var að uppfæra spá um fjölgun ferðamanna, úr 22% aukningu í 37% aukningu - miðað við í fyrra. Til stendur að nota 20 milljarða í viðbyggingar við Leifsstöð á árinu. Hvar endar þetta eiginlega? Hvað getur þetta land tekið við mörgum? Og: Ef það gefur á bátinn í efnahagskerfi landanna sem ferðamennirnir koma frá, er þá flúðasiglingaferðin til Íslands ekki eitt af því fyrsta sem fólk hættir við að fá sér?

Spádómur: Í næstu kreppu (sem er kannski ekki langt undan) mun ferðamönnum til Íslands fækka um helming miðað við árið á undan. Hvað verður þá um öll nýju, fínu hótelin sem nú eru í byggingu?

Fordæmið er ekki langt undan: Spánn er ekki ennþá búinn að rétta úr kútnum eftir að þýskir ellilífeyrisþegar hættu að kaupa sér annað heimili í sólinni fyrir 7-8 árum síðan.

Það er ekki nóg að byggja bara meira og meira upp af gistirýmum og öðrum innviðum. Það þarf líka að segja stopp á einhverjum tímapunkti. Stjórnvöld þurfa að gera það. Annað væri óábyrgt.

Hvergi nærri hámarki ferðamannafjölda

Kynningarfundur Alþýðufylkingar á laugardag

Alþýðufylkingin heldur opinn kynningar- og umræðufund í Friðarhúsi næsta laugardag (20. febrúar) kl. 13. Skoðið fréttatilkynninguna:

Opinn fundur í Reykjavík nk. laugardag

...og mætið svo þangað og takið gesti með ykkur.

 

TISA og lýðræði á undanhaldi

Á heimasíðu Alþýðufylkingarinnar var að birtast gagnmerk samantekt Þórarins Hjartarsonar á aðalatriðum TISA-samningaviðræðnanna:

TISA og lýðræði á undanhaldi

Veraldarhyggju kennt um

Menn þurfa að vera heilaþvegnir til að kenna veraldarhyggju (sekularismus, laïcité) um hvernig komið er fyrir múslimum í Frakklandi. Vandamál sem mörgum er tamt að tengja við þá eru margvísleg, en þau eru í fyrsta lagi ekki bundin við múslima sem slíka og í öðru lagi eru þau félagsleg. Rasismi ýtir fórnarlömbum sínum út á jaðar samfélagsins og lætur þeim líða eins og þau eigi ekkert sameiginlegt með samfélaginu sem útskúfar þeim. Um leið dregur hann úr samstöðu fátæks fólk, sem fyrir vikið á erfiðara með að berjast fyrir rétti sínum.

Front National helsta skotmark Ríkis íslams

Stjórnarskrá og neyðarástand

Allir þekkja hvernig Hitler & Co. notuðu ákvæði þýsku stjórnarskrárinnar um neyðarástand til þess að taka sér öll völd, og ég ætla ekki að rekja það hér.

Ég efast líka um gagnsemi þess að stjórnarskrárbinda ákvæði um neyðarástand.

En ef það eru misnotkun og fasismi sem menn óttast, þá er það falskt öryggi að hafa ekki þannig ákvæði. Fasistar hafa nefnilega ekki sett það fyrir sig hingað til. Í löndum þar sem fastistar eða herforingjastjórnir hafa tekið völdin án þess að hafa svona ákvæði, hafa þeir bara numið stjórnarksrána úr gildi, ellegar vikið henni til hliðar "um stundarsakir" meðan þeir "koma á röð og reglu".

Það eru önnur atriði sem er meiri ástæða til að hafa áhyggjur af: hernaðarstefna, rasismi, eftirlitssamfélag, lögregluríki, fátækt og félagsleg vandamál.

„Neyðarástand“ í stjórnarskrána

Eins og kynferðislegur lotugræðgissjúklingur?

"Þótt náttúran sé lamin með lurk leitar hún út um síðir."

Ekki veit ég eftir hverjum þetta er upphaflega haft, en það gildir um kaþólsku kirkjuna eins og annað, að það kann ekki góðri lukku að stýra að ætla að bæla niður eðlilegar hvatir fólks.

Krafa um að prestar séu skírlífir er gott dæmi um þetta. Fólk hefur kynhvöt. Prestar eru fólk. Ef það er reynt að afneita kynhvötinni um eðlilega útrás, leitar hún bara í staðinn að einhverri annarri útrás. Þarf að ræða það eitthvað frekar?

Annað: Fordæming á samkynhneigð gerir það að verkum að fólk lifir inni í skáp skammar og fordóma sjálfra sín og annarra í stað þess að fylgja tilfinningum sínum. Heldur einhver að það kunni górði lukku að stýra?

Þriðja: Löng saga yfirhylmingar skapar kjöraðstæður fyrir öfugugga.

Mig minnir að það hafi verið Christopher Hitchens sem líkti sambandi kaþólsku kirkjunnar við kynlíf saman við samband lotugræðgissjúklings við mat. Strangt svelti og hömluleysi til skiptis.

Kirkjan siðferðilega gjaldþrota?

"Tók af lífi"?

Orðrétt tilvitnun í fréttina:

"Til að mynda tók reiður elsk­hugi konu af lífi í versl­un­ar­miðstöð í fyrra"

Er eðlilegt að nota orðin "taka af lífi" þegar greinilega er um morð að ræða?

Skaut fjögur börn sín til bana

Útlendingar haldnir útlendingaandúð

Við sem erum ekki útlendingar gleymum því stundum að innflytjendur hafa mjög fjölbreyttar skoðanir og að sumir þeirra eru rasistar. Ég var einu sinni að vinna með einum slíkum, síkátum stráki frá Austur-Evrópu, sem sagðist vera "föðurlandsvinur" og kunni að segja "fóstureyðing" á ensku, en ekki "stéttarfélag". Hann var harður á því hvað hann og félagar hans væru vinnusamir og duglegir (þeir voru það) en fannst flest hörundsdekkra fólk vera afætur á samfélaginu. Það gátu kallast fleyg orð, þegar hann sagði: "Sko, ég er ekki rasisti, en hvað er eiginlega að svertingjum!? Þeir eru svo heimskri! Og klikkaðir!"

Ætluðu að ráðast á hælisleitendur

Enn eitt déskotans hótelið!

Ókei, ég skil það sjónarmið hóteleigenda og annarra peningamanna að vilja maka krókinn og skara eld að sinni köku, en sem íbúi í Reykjavík og á Íslandi spyr ég: hvenær verður komið nóg?

Átroðningur ferðaþjónustunnar er farinn að þrýsta mjög á miðbæ Reykjavíkur, m.a. á fasteignaverðið, sem þýðir að fólk á lægri enda tekjurófsins er farið að hrekjast burt.

Hér kemur milljón ferðamanna á einu ári - og það er eins og stjórnvöld láti bara skeika að sköpuðu, láti markaðinn bara um þetta, vaxa bara og vaxa eins og endalaus vöxtur sé hugsanlegur - kannski í anda þess "hvað það væri gaman ef við gæfum bara í", eins og Hannes Hólmsteinn orðaði það svo spámannlega hér korteri fyrir hrun.

Hvar endar þetta? Í tveim milljónum ferðamanna? Í þrem milljónum? Í fimmtán milljónum? Ég bara spyr.

Hafa menn áttað sig á því hvað verður um öll herlegheitin næst þegar kemur kreppa í löndunum sem túristarnir koma frá? Ætli flúðasiglingaferðin til Íslands verði ekki eitt af því fyrsta sem fólk neitar sér um þegar ráðstöfunartekjurnar minnka?

Eins og þegar þýskir eldri borgarar hættu að kaupa sér annað heimili á Spáni fyrir nokkrum árum?

Austurvöllur mun breyta um svip

Félagsvæðum fjármálakerfið

Þetta mál er bara eitt dæmi af mýgrút, um ókosti þess að hafa fjármálakerfi sem er rekið í gróðaskyni fyrir auðvaldið.

Fjármálakerfið á að vera rekið samfélagslega og gróðinn af því á að koma fram í hagstæðri fjármálaþjónustu við fólk og fyrirtæki. Þau eiga m.ö.o. ekki að hafa arð af viðskiptum sínum heldur eiga þau að þjóna samfélaginu, sem á að hafa arð af að nýta sér þjónustuna.

Borgunarsalan „augljóst klúður“

Hvaðan kemur allt þetta flóttafólk?

Flest flóttafólkið sem streymir nú til Evrópu er að flýja frá löndum sem eru í rúst eftir hernað heimsveldanna, ekki síst NATÓ (með þátttöku Íslands, ef einhver var búinn að gleyma því). Flóttamannastraumi fylgja vitanlega margvísleg vandamál -- en þeim vandamálum er tæpast hægt að líkja við vandamálin sem fólkið er að flýja. Flóttamenn koma, eðli málsins samkvæmt, ekki af því að þá langi bara til að koma, heldur eru þeir á flótta.

Ef fólk vill ekki flóttamannastraum -- og auðvitað vill hann enginn -- þá væri góð byrjun að hætta að taka þátt í að drepa fólk í öðrum löndum og rústa heimkynnum þess. Þið sem studduð Íraksstríðið og Afganistanstríðið eða loftárásirnar á Líbíu og Júgóslavíu -- munið það næst þegar á að fara í stríð og landsfeðurnir og spunarokkarnir fara að tala um hvað þessi eða hinn forsetinn sé mikill skúrkur.

Óvinurinn heitir: Heimsvaldastefnan. Hún er aflið sem sundrar friði og rekur fólk á flótta. Hún er skúrkurinn sem þarf að knésetja.

Björguðu 150 þúsund mannslífum

Tvær athugasemdir

1. Hver gerði þessa opinberu rannsókn? Bretar?

2. Samþykkti Pútín morðið? Rannsóknarkýrslan heldur því fram. Blaðamaðurinn slær því upp eins og það sé staðreynd. Er blaðamaðurinn að segja að það sé staðreynd?

„Pútín samþykkti morðið “

Stórhættulegt -- ætti að banna það?

Maður sér nokkrum sinnum á ári fréttir um að elsta fólk í heimi sé dáið. Það er greinilegt að það er lífshættulegt að vera elstur í heimi. Það er spurning hvort þarf ekki að banna það, til þess að forða fólki frá hættu?

Látinn 112 ára að aldri

ISIS, handbendi heimsvaldastefnunnar

Lesið grein Þórarins Hjartarsonar á Friðarvefnum:

Vestrið og gerfistríðið við ISIS.

Mættu vera margfalt fleiri, en...

Ísland er, þrátt fyrir allt, eitt ríkasta land í heimi. Við gætum auðveldlega tekið við margföldum þeim fjölda flóttamanna sem við gerum, og þar af leiðandi ættum við að gera það. Það ætti að líta á það sem góðan árangur, já, sem sigur, að hjálpa sem flestum bágstöddum.

Það er auvirðilegt að stilla flóttamönnum upp sem andstæðu við skjólstæðinga íslenska velferðarkerfisins. Þetta er ekki annað-hvort-eða spurning, heldur eru kjör öryrkja og aldraðra tekin í gíslingu með slíku tali. Útgjöld til velferðarmála eru ekki föst stærð, heldur pólitískt ákveðin. Þannig væri nærtækara að draga öryrkja og aldraða inn í umræðuna um arðgreiðslur banka eða útgerðarinnar.

Aðalatriðið er samt orsökin fyrir því að allt þetta fólk hrekst á flótta. Finnst einhverjum skrítið að barnafólk flýi undan dauðasveitum ISIS? Finnst einhverjum það vera léttvæg ástæða?

Þá má halda því til haga að Ísland hefur stutt nánast hvern einasta hernaðarleiðangur Nató og Vesturveldanna undanfarna áratugi. Það hefur afleiðingar, og því fylgir ábyrgð. Það vill enginn að milljónir manna séu á flótta. Á skal að ósi stemma: Ísland á að hætta að styðja árásarstríð og fara að beita sér fyrir friði í heiminum. Það væri gagn í því.

82 fengu hæli á Íslandi í fyrra

Brask með eignir almennings

Norski olíusjóðurinn er útópía sem m.a. borgaralegir vinstrimenn trúa á. Trúa á, að það sé hægt að þjóna langtímahagsmunum alþýðunnar með sjóðssöfnun og fjármálabraski, þótt allur hugsanlegur gróði af slíku komi alltaf á endanum úr vösum alþýðunnar sjálfrar. Þetta er sama hugsunarvillan og trúin á íslensku lífeyrissjóðina byggist á. Trúin á kapítalismann.

Í kapítalisma koma kreppur nokkrum sinnum á hverri meðalstarfsævi. Það er staðreynd. Mundi einhverjum detta í hug að safna matarforða til elliáranna og geyma hann svo í geymslu sem væri vitað að ætti eftir að brenna a.m.k. tvisvar eða þrisvar áður en ætti að éta hann?

Það getur ekkert vaxið endalaust. Það er staðreynd. Hagkerfið getur heldur ekki vaxið endalaust. Þegar af þeirri ástæðu er gróðahlutfallið dæmt til að minnka strax og menn fara að nálgast endimörk vaxtarins. Burtséð frá því krefjast þróaðri atvinnuhættir sífellt meiri fjárfestingar, sem aftur ber fjármagnskostnað, þannig að á þeim enda lækkar gróðahlutfallið líka.

Í tilfelli íslensku lífeyrissjóðanna, þá ávaxta þeir sig að miklu leyti með húsnæðislánum til sjóðsfélaga, á markaðskjörum. Meira en helmingurinn af húsnæðiskostnaði er vextir. Mundi einhver með öllum mjalla borga 100 milljónir fyrir hús sem kostar 40 milljónir? Það hljómar kannski klikkað, en margir gera það samt.

Tveir þriðju olíusjóðsins þurrkast út

Síðasta nýlenda Afríku

Vestur-Sahara er stundum kallað síðasta nýlendan í Afríku. Ekki höfðu spænsku nýlenduherrarnir fyrr yfirgefið svæðið, en marokkóski herinn kom og lagði það undir sig og innlimaði í Marokkó. Þeir hafa síðan farið með rányrkju um auðlindirnar - einkum auðugar fosfatnámur (fosföt eru einkum notuð í kemískan áburð fyrir landbúnað) og fiskimið, þar sem m.a. íslensk sjávarútvegsfyrirtæki hafa fagnandi tekið þátt í að ryksuga upp þjófstolinn hestamakríl.

Til að styrkja hernám sitt í sessi hafa marokkóskir landnemar svo verið fengnir til að setjast að í Vestur-Sahara.

Þess má geta að Vestur-Saharamenn (Sahrawi-þjóðin) eru innan við milljón talsins og Marokkómenn 33 milljónir.

Svíar viðurkenna ekki Vestur-Sahara

Tímamótakönnun

Þessi könnun Siðmenntar er bylmingshögg í borð trúmálaumræðu á Íslandi og sýnir skýrt ýmislegt sem var ekki nogu skýrt fyrir, þótt margt af því komi svo sem ekki á óvart.

Mér finnst kyndug fyrirsögnin á frétt Mogga. Helmingur aðspurðra sagðist vilja aðskilnað ríkis og kirkju. Fimmti hver er á móti. Þriðjungur er óákveðinn. Fyrir sögnin "49% hlynnt aðskilnaði" er ekki beinlínis röng -- en hún gefur villandi mynd.

Það er margt í þessu. Eitt þarf ég að benda á. Í ráðgefandi þjóðaratkvæðagreiðslu um nýja stjórnarskrá 2012 skar spurningin um kirkjuna og stjórnarskrána sig úr, hún var orðuð svo óskýrt að margir misskildu hana og kusu þess vegna ekki það sem þeir ætluðu að kjósa. Árið 2012 lýstu 72% landsmanna sig hlynnta aðskilnaði. Ég vil vita hver ákvað hvernig spurningin ætti að vera orðuð. Þetta lítur út eins og skemmdarverk.

49% hlynntir aðskilnaði ríkis og kirkju

Glópagull

Þeir hafa aldeilis fengið gullið á hagstæðu verði, ef 60 milljónir íslenskar borga bæði gullið og vinnuna við uppsetninguna, þegar tekið er tillit til þess að miðað við heimsmarkaðsverð á gulli fengi maður ekki meira en ca. 15 kíló fyrir þennan pening.

Getur verið önnur skýring?

Mogginn segir "stytta úr gulli", BBC segir "gold painted".

Risavaxin stytta fjarlægð